रोकिएको पुनर्वासको कार्यक्रम सुचारू

पूनर्वासका लागि अमेरिका जाने क्रममा काठमाण्डौको त्रिभुवन अन्तर्राष्ट्रिय विमानस्थलवाट हिजो फर्काइएका २६ जना भुटानी शरणार्थीलाई आज पुनः त्यसतर्फ लगिएको छ । अमेररिकाको ‘आन्तरीक सुरक्षासम्वन्धी नीतिमा पुनर्विचार गर्नुपर्ने’ कारण देखाउँदै अमेरिकाले झापा र मोरङको शिविरवाट आप्रवाससम्वन्धी अन्तराष्ट्रिय संगठन (आइओएम) मार्फत पुनर्वासका लागि लगेका ती शरणार्थीको हिजो एक्कासी उडान रोकेको थियो । हिजो नै शिविरवाट पुनर्वासकालागि काठमाण्डौतर्फ लैजाने क्रममा भद्रपुर विमान स्थलवाट १ सयजना शरणार्थी फिर्ता गरिएको थियो । फर्काइएका ती शरणार्थीलाईसमेत आज नै काठमाण्डौतर्फ लगिएको स्रोतले जनाएको छ ।

७० हजार शरणार्थीलाई आफ्नो देशमा पुनर्वास गराउने योजनाकासाथ सन् २००८ देखि अमेरिकाले आप्रवाससम्वन्धी अन्तर्राष्ट्रिय संस्था आइओएममार्फत पुनर्वासको कार्यक्रम सुरु गरेको थियो । सो कार्यक्रम अर्न्तगत हालसम्म अमेरिकामा मात्र ३५ हजारभन्दा बढि भुटानी शरणार्थी पुर्नवास भइसकेका छन् । अमेरिकासहित विभिन्न आठ मुलुकमा पुर्नवास हुने शरणार्थीको संख्या ४२ हजार १८४ नाघेको युएनएचसीआरले जानकारी दिएको छ ।